ಏರ್ ಮಾರ್ಶಲ್ ಆರ್‌ಕೆಎಸ್ ಭದೌರಿಯಾ ಮುಂದಿನ ವಾಯುಪಡೆ ಮುಖ್ಯಸ್ಥ

ನವದೆಹಲಿ: ವಾಯು ಸಿಬ್ಬಂದಿಯ ಉಪ ಮುಖ್ಯಸ್ಥ ಏರ್ ಮಾರ್ಶಲ್ ಆರ್‌ಕೆಎಸ್ ಭದೌರಿಯಾ ಅವರು ಭಾರತದ ವಾಯುಪಡೆಯ ಮುಂದಿನ ಮುಖ್ಯಸ್ಥರಾಗಿ ನೇಮಕಗೊಂಡಿದ್ದಾರೆ ಎಂದು ರಕ್ಷಣಾ ಸಚಿವಾಲಯವು 2019 ಸೆಪ್ಟೆಂಬರ್ 19ರ ಗುರುವಾರ ಪ್ರಕಟಿಸಿತು.

ಏರ್ ಮಾರ್ಶಲ್ ಆರ್‌ಕೆಎಸ್ ಭದೌರಿಯಾ ಅವರು ಫ್ರಾನ್ಸ್ ಜೊತೆಗೆ ರಫೇಲ್ ವಿಮಾನ ವಹಿವಾಟಿಗೆ ಸಂಬಂಧಿಸಿದಂತೆ ಮಾತುಕತೆ ನಡೆಸಿದ್ದ ತಂಡದ ನೇತೃತ್ವ ವಹಿಸಿದ್ದರು. ಭದೌರಿಯಾ ಅವರು ಸೆಪ್ಟೆಂಬರ್ ೩೦ರಂದು ನಿವೃತ್ತರಾಗಲಿರುವ ಏರ್ ಚೀಫ್ ಮಾರ್ಶಲ್ ಬಿಎಸ್ ಧನೋವಾ ಅವರ ಉತ್ತರಾಧಿಕಾರಿಯಾಗಿ ನೇಮಕಗೊಂಡರು.

ಭದೌರಿಯಾ ನೇಮಕಾತಿ ವಿಚಾರವನ್ನು ರಕ್ಷಣ ಸಚಿವಾಲಯದ ಮುಖ್ಯ ವಕ್ತಾರರು ಟ್ವೀಟ್ ಮಾಡಿದರು.

೧೯೮೦ರಲ್ಲಿ ವಾಯುಪಡೆಯ ಸಮರತಂಡಕ್ಕೆ ಸೇರ್ಪಡೆಯಾಗಿದ್ದ ಭದೌರಿಯಾ ಅವರು ತಮ್ಮ ಅರ್ಹತೆಗಾಗಿ ಪ್ರತಿಷ್ಠಿತ ’ಗೌರವ ಖಡ್ಗ’ (ಸ್ವೋರ್ಡ್ ಆಫ್ ಆನರ್) ಪುರಸ್ಕಾರ ಪಡೆದಿದ್ದರು.